Masoor Sindhi
1 min read
اديب ـ ڊراما نگار ـ ترجمي نگار ـ مصور ـ صوفي سنڌ جو رولاڪ روح ـ سائنس ۽ صوفي ازم جو ڄاڻو ـ دنيا جي ١٣ ٻولين جو ڄاڻو ـ دنيا ۾ ذھني ڏاھپ جو وڏو نالو ڊاڪٽر عاشق البدوي
سنڌي عربي انگريزي اردو فرينچ بلوچي سرائڪي فارسي ھندي ۽ ٻين ٻولين ۾ مھارت رکندڙ ڊاڪٽر عاشق حسين احمداڻي المعروف ڊاڪٽر عاشق حسين البدوي 30 جون 1947 تي شڪارپور ۾ ڄائو ـ ٽنڊي آدم نپايو ـ 19 آگسٽ 2012 تي ڪراچيء جي رائل ھوٽل جي ڪمري نمبر 19 ۾ گذاري ويو ۽ ٽنڊي آدم جي خالق ڏني ساند قبرستان ۾ دفنايو ويو ـ
1970 ۾ لياقت ميڊيڪل ڪاليج ڄامشوري مان ڊاڪٽريء جي ڊگري وٺي آرميء جي ميڊيڪل ڪور ۾ داخل ٿيو آرميء جي مختلف محاذن تي ڊيوٽي ڏيڻ کان پوء سعودي عرب مصر مالٽا ۽ ليبيا ۾ پڻ ڊاڪٽر طور فرض انجام ڏنائين ـ ليبيا ۾ رھڻ دوران ڪرنل قذافيء جو ذاتي معالج ۽ ذاتي دوست پڻ رھيو ـ
ادب فلسفو نفسيات قومن جي تاريخ قديم تاريخ ۽ تھذيب دنيا جا مذهب تصوف سائنس عرفانيت ايسٽرانامي مخفي علم ۽ موسيقيء سان محبت ڪندڙ ھن عظيم اسڪالر جا 18 ڪتاب ڇپيل آهن جڏهن ت 30 کان مٿي مسودا ۽ ھزارين ڪتابن جي ليبريري ۽ اجڙيل حويلي سندس سار جي سفر جا نشان آهن ـ ڊاڪٽر عاشق حسين 1981 ۾ ٽنڊي آدم ۾ پدم پبليڪيشن جو بنياد رکي اشاعت جو سلسلو شروع ڪيو ـ دنيا جي انگريزي ادب مان چونڊ ڪھاڻيون ترجمو ڪري ( چونڊ شاھڪار ڪھاڻيون ) جي نالي سان ڊسمبر 1981 ۾ ڪتاب ڇپايائين ـ طب جي دنيا ۾ ( چمڙيء جون بيماريون ) پھريون سنڌي طبي ڪتاب ڇپايائين ـ ھن مختلف زبانن ۾ 200 کان مٿي مضمون ۽ مقالا لکيا ـ زندگيء جي آخري گھڙين ۾ اردو اخبار ايڪپريس جو مستقل ڪالم نگار رھيو ـ ھن انگريزي عربي ۽ فارسي جي شاھڪار ڪتابن جا پڻ ترجما ڪيا جن ۾ ابن عربيء جو جڳ مشهور ڪتاب فصوص الحڪم ۽ ٻيا ڪتاب شامل آهن ڊاڪٽر عاشق البدوي سنڌي ٻولي اٿارٽيء لاء ٻه ميڊيڪل لغتون انگريزيء مان سنڌي ۽ سنڌيء مان انگريزي لکيون ـ ھن انگريزي ٻوليء ۾ The mystic poets of sindh جھڙو شاھڪار ڪتاب ب لکيو ـ سندس صوفي ازم جي ڊڪشنري ۽ ٻيا ڪتاب سنڌي ٻولي اٿارٽي وٽ اڻ ڇپيل پيا آهن ـ پاڻيء جي مسئلي تي سندس سنڌ ٽي وي تي يادگار ڊرامو سنڌ جي صدا آهي ـ 19 آگسٽ 2012 تي ڪراچي سٽي اسٽيشن ڀرسان ھڪ قديم اجاڙ ھوٽل رأئل جي ڪمري نمبر 19 ۾ جنهن ۾ رڳو ڪتاب ۽ ڊاڪٽر عاشق رھندا ھئا قيد تنھائيء ۾ گذاري ويو ـ